倫敦奧運當局落實，碧咸今日較後時間會同安妮公主及官員前往雅典，負責聖火交接工作，將聖火由希臘帶到倫敦，展開長達12,875公里環英國聖火傳遞活動。碧咸嘅前曼聯隊友傑斯話，好期待入選英國足球隊，參與呢項體壇盛事。
碧咸有份協助倫敦奪得奧運主辦權，亦係英國體壇代表人物，接收聖火自然唔少得佢。聖火到達倫敦後，會展開為期七十日嘅傳遞活動，約有八千人參與，起點係康沃爾郡，終點為蘇格蘭設得蘭群島。
另外，碧咸日前作客白宮，慘遭美國總統奧巴馬勁寸！上季美職總冠軍洛杉磯銀河獲邀前往白宮參觀，並同奧巴馬會面。點知奧巴馬唔係讚咸哥好波，而係話佢「年紀大」，做得半隊隊友嘅爸爸，仲話碧咸拍內褲廣告，凸顯佢係一位「硬」漢添！
奧巴馬同碧咸上年五月喺倫敦見過面，已經係「老友」，所以總統先生今次好隨和，同咸哥大開玩笑，話呢位卅七歲老將做得銀河一半球員嘅爸爸，但都保養得比自己好。
奧巴馬亦提到碧咸喺二月為H&M拍攝嘅內褲廣告，話好少人可以好似咸哥無論場內場外，表現都咁「硬朗」，令全場笑聲四起。
碧咸當然知道奧巴馬只係講笑，並冇介意，之後仲喺第一夫人米歇爾陪同下，教小朋友踢波，但由於天氣欠佳，只能喺室內上堂，回答有關足球知識提問。