林書豪未能奇迹地重回季後賽戰場，筆者終於放下心頭大石。一直有傳書豪（或紐約人高層？）極力爭取第四戰或第五戰回歸，但一個疏於戰陣，加上身體狀況未達到100%的控衞（至今連跳起掂框都未得），可以幫到球隊幾多？值唔值得為一兩場勝利而影響下季？
2003年魯域斯基帶領小牛殺入西岸決賽，可惜第三場不幸同真路比利相撞導致左膝韌帶扭傷。雖然班主古班希望魯域斯基繼續比賽，但教練尼爾遜為保護愛徒反晒面同古班講：「我哋可以冇咗一個球季、一個冠軍，但唔可以冇咗魯域斯基！」結果小牛雖然要等足8年先拎到總冠軍，但至少冇因為一次短視決定而斷送冠軍夢。
書豪日前表示唔排除考慮代表中國男籃出戰奧運，但筆者建議佢真係要三思。下季對書豪相當重要，究竟係留守紐約人定轉投其他球隊？可否簽到一份高薪合同？前車可鑑，我一直認為易建聯同孫悅唔能夠喺NBA創一番事業，最主要係季後要代表國家隊或省隊比賽，而沒有足夠時間接受球會訓練。不過，唔係人人都係禿鷹曾，言論係可以收回嘅！