同成班「籃」朋友 傾「足」一晚
由上星期到嚟緊周二凌晨，體壇大戰一浪接一浪，歐聯4強次回合兩仗扣人心弦，而NBA季後賽已經開打，再加上英超「曼市打吡」蓄勢以待，喜歡體育嘅朋友真係目不暇給，唔使去旅行、唔使去拍拖，安坐家中睇波都已經夠正斗。
早喺一個月前，我於本欄已經講過，波場上冇嘢係冇可能，車路士打少一個，都可死守擯巴塞出局；曼聯早幾周仲領先曼城8分，但之後竟然無喇喇失分畀死敵追上，如果嚟緊輸畀曼城，分分鐘隻冠軍獎盃嘔番出來。淨係睇呢兩個例子，就知足球係幾咁峰迴路轉，就好似伍晃榮所講：「波係圓嘅！」其實睇番兩場歐聯4強戰況，睇到兩邊對賽實力都好接近，但車仔施治、杜奧巴、拉美利斯超弗，拜仁紐亞、列貝利狀態亦好好，兩軍就憑一班「托弗」戰將，成功殺出重圍。NBA方面季後賽開打，但依家估邊隊奪標真係言之尚早；但邊隊較少受傷患困擾就力足攞冠軍。
愉快時刻有錢買唔到
上周四晚，Peter偷得浮生半日閒，應香港籃總主席陳瑞添及「豪情」領隊呂少文之約，同好多本地籃球現役同退役巨星如宋方、李偉倫、翁金驊、譚偉洋等暢聚，席間知道佢哋原來都好鍾意睇足球，當晚Peter就同佢哋來個籃球、足球Crossover，舉杯大傾波經，真係過癮。於波壇打滾半世紀，以波會友識得各界人士，呢啲愉快時刻，的確有錢都買唔到！
金句：
睇波為樂，以波為友，
豐盛人生，夫復何求！