《無間道》嘅劉健明想做好人，奧當只係想做湖人。奧當今季被湖人拋棄，但跌咗個橙執番個桔，加盟衞冕冠軍小牛，至少可以繼續為冠軍而戰。不過離奇地，奧當今季平均表現大幅下跌至僅得6.6分同4.2個籃板，罰球命中率亦唔過六成。表面上奧當係未能融入體系，但實際上因為佢要兼顧同老婆嘅真人Show，加上未能忘卻畀湖人拋棄嘅傷痛，所以打到一舊屎。
奧當今季認真神神化化，季中無厘頭要求球隊下放佢到發展聯盟重拾狀態，又話球隊應該畀多啲機會易建聯，自己冇得打都冇所謂，如果今季「有最佳Hea打同最佳臥底球員獎」，肯定非佢莫屬。
奧當咁冇職業道德，引嚟好多球迷圍插，筆者相信下季小牛賣斷佢後，佢好難得到一份超過500萬年薪嘅合約。不過小牛自己都要負一定責任，因為今季買入奧當、卡特等老將，但係放走攻守核心贊特拿同巴利亞，睇嚟今季都唔使奢望衞冕成功。古班如意算盤係希望下季等多個球員約滿後，簽入「超人」杜域侯活、迪倫威廉士同魯域斯基做三巨頭，咁就有望將來連奪多年總冠軍。