同陳靖瞓唔使冚被！
唔好睇我細細隻，我喺屋企地位絕對唔低，全屋任我走，最鍾意嘅就係梳化，趴喺軟綿綿嘅咕o臣睇電視就最正，我唔係好鍾意有客人嚟屋企，因為佢哋會霸住我最愛嘅地方。
Micha係我個名，係聖經故事裏面嘅先知，爸爸話主要因為讀起嚟好聽。我今年四歲嘞，重6、7磅左右，我乜都食，總之好味嘅就會放落口。每晚我都會「捐」去同阿爸阿媽瞓，通常會瞓喺陳靖隔籬，因為佢肥嘟嘟，唔使冚被都夠暖，但佢有時瞓着會用「天殘腳」踢我，真係畀佢激死。
生眼瘡嚇親媽咪
其實我好細膽，有乜風吹草動，我會走到阿爸阿媽身邊，我曾經迷失過，情緒好低落，以為爸媽有咗陳靖就唔錫我，其實佢哋好緊張我，啱啱我又做咗個小手術，因為隻眼附近生咗個大瘡，令媽咪擔心到飯都食唔落。
阿爸好鍾意玩滑浪風帆，但我就好怕水，我亦好怕嘈，所以最唔鍾意陳靖喊，依家佢大個仔，喊少咗、笑多咗，我哋就愈來愈啱Key囉!