陳敬然方知狗會抑鬱
「狗狗，都有尊嚴！」很多人養寵物都是愛心爆棚，視貓狗為己出，每日攬攬抱抱錫到燶，但或許有時會忽略牠們的感受，《體貼得寵》第一擊就找來「風之子」陳敬然，細談「升呢」做爸爸後的深切體會，原來他的愛犬Micha曾因囝囝陳靖出世後失寵而患上抑鬱症，因妒忌而全身抽筋，險送狗命！
搵「阿英」做訪問，過去話題不離滑浪風帆、結婚生仔，但原來他另一個家庭成員小狗Micha，也有值得分享的故事。四年前從寵物店把當時僅得兩個月大的約瑟爹利Micha帶回家，主要慰藉太太因「阿英」常常出外比賽的相思之苦，「一家三口」生活維持了兩年，愛子陳靖就出世了，「阿英」想不到做爹哋即遇上難忘經歷：「陳靖回家一、兩個星期，Micha都冇問題，但到第三周本來好活潑嘅Micha就對我哋唔瞅唔睬，又唔食嘢，成個禮拜只縮在角落，仲要有時會四腳朝天咁抽筋，好似就死一樣。」
有BB後更懂狗性
原來這是Micha妒忌BB的反應，在醫生指導下，不足一星期Micha立即生猛番。阿英憶述：「醫生話佢抑鬱，所以叫我哋每日回家先叫叫佢，摸摸佢，玩10分鐘至抱BB，等佢知道有存在價值，幾日後真係冇事，真神奇。」
這個經歷令「阿英」有很深的體會：「其實我哋好錫Micha，當咗佢係仔一樣，但冇想過原來狗都有情緒，呢次經歷畀我哋知道不論人或狗，都要尊重佢哋，要諗吓佢哋嘅感受，對於我哋教導小朋友都有很大領悟。」
教導兒子同寵物相處
Micha可愛、「英之子」陳靖更可愛，「阿英」對於兩個囝囝相處亦花了很多心機：「佢哋試過互咬，各不相讓，阿仔細個時又會打Micha，後來我哋不停講、不停教，佢哋相處好咗好多，阿仔有幾次更食咗Micha啲狗糧，食到咯咯聲，不過，依家大多數係Micha等陳靖餵佢，因為有時阿仔食飯食到天一半地一半，Micha就可以坐定定等食。」
愛犬與愛子由妒忌變為互愛，當中包含多方面的知識，令「阿英」上了寶貴一課。
主人威威
陳敬然
年齡：29歲
現職：學生、滑浪風帆教練（Part Time）
運動主項：滑浪風帆
威水史：06及10年亞運會滑浪風帆金牌、08年北京奧運第6名
圖／文：李芷韻、徐飛