W Hotel 38/F「豪」宅曝光

小記在now TV安排下入住紐約Downtown的W Hotel，首次與酒店總經理韋咸及公關Daniel會面時，兩人均以保障客人私隱為由，對林書豪隻字不提。本身搞緊幾個大Project、並於W Hotel主理銷售的Nassimi，昨日帶記者參觀示範單位時突然玩自爆，指林書豪確實住在酒店38樓，並曾經與J.Lin見過幾次面，令在旁的公關Daniel相當不悅。

鍾意匿喺房做宅男叫外賣

此時小記打蛇隨棍上繼續追問，Nassimi隨即揭發林書豪的宅男真面目：「Jeremy好好仔，謙虛又低調，不過佢真係可以足不出戶，幾乎每晚都係嗌Room Service或者外賣醫肚，酒店樓下間BLT漢堡就係佢至愛。仲有，佢喺紐約人操完都唔夠喉，返到嚟都會用會所嘅健身室，同埋佢試過叫菲爾斯、謝菲利斯同森柏特幾位隊友上房，三個麻甩佬喺房唔知搞乜！」

Nassimi昨日帶記者參觀位處38樓的尊貴套房，雖然每個單位的裝潢及布置都有分別，但大致上都與「瘋宅」相同。

據悉，W Hotel一個至平單位標價185萬美元（約一千四百萬港元），加上又可見到自由神像等靚景，難怪林書豪流口水，Nassimi指單位月租要1.3萬美元（約十萬港元），並承認公司向J.Lin開出優惠價，但減幾多就拒絕透露。