波男以前經常入場睇本地波，每個禮拜總有一到兩次，但近十幾年已經少好多，甚至近乎零。上星期有公關請我去旺角場睇香港對中華台北，發覺本地波唔係完全冇得搞，但真係要講橋！
當晚旺角場有超過五千人入場，場面出人意表咁熱鬧，負責宣傳嘅公關公司亦如釋重負。事關之前佢哋搞宣傳，推出「嗌爆旺角場」、「摩帥網上答問題」等噱頭，都被網民大鬧特鬧，話冇料到。但數字先至係事實，入場人數證明，佢哋嘅宣傳方向絕對正確。網民喺討論區幾時都係彈多過讚，所以睇網評唔好咁緊張，用最老土嗰句「有則改之，無則加勉」就啱嘞！
今次公關公司策略非常到位，主打宣傳招數係刺激球迷，要入場為香港隊打氣，完全食正現時社會氣候。香港足球積弱多年，但每次當佢突然發威（如南華打入亞協四強，香港代表隊贏東亞運金牌），必然令好多香港fans陷入歇斯底里狂熱狀態，證明香港波唔係冇人關心，大家依然好想支持佢，但欠缺咗一個入場動力。
今次公關公司諗出「嗌爆旺角場」口號，其實配合到現時社會民情高漲，渴望回歸香港本位情緒，但做得未夠盡，依波男獻計，可以搞一系列賽事，專請菲律賓、斐濟、巴巴多斯、巴基斯坦呢類弱旅，賽事系列就叫「香港爭氣波」，跟住打出「香港一定掂」、「香港波唔係垃圾」、「打倒足球霸權，還香港足球公道」，宣傳語句夠煽情就可以賣多幾張飛。一季搞多三幾場，成本低效益大，到時足總庫房水浸，仲使乜驚冇錢，下下要求政府呢？
呢條橋波男私人醒，主席隨便用，唔使多謝我嘞！