銀牌慶功 晨曦成龍撐場
日之泉JC晨曦銀牌慶功宴變成龍簽名會！晨曦前晚在賽馬會會所設宴，慶祝奪得今屆高級組銀牌冠軍，並取得來屆亞洲足協盃參賽資格，會方即場發放冠軍獎金，職、球員無不笑逐顏開。但最令「橙軍」興奮，係球隊冠名贊助商之一嘅成龍，百忙中抽空到場，羅拔圖、巴利等球場猛將，即時全部變晒小影迷，爭住同「大哥」合照簽名。
晨曦會長周文亮開席前講番上月十八日銀牌決賽激烈戰況，感謝一班奮戰到底的手足時，令現場情緒高漲，多名攞冠軍後曾激動到喊嘅球員，更互相取笑對方喊樣，當大家守候多時嘅特別嘉賓JC成龍大哥現身之時，氣氛更升至沸點。
下周赴穗友賽日之泉
首年贊助即過奪標癮嘅成龍，鼓勵一班銀牌冠軍功臣：「好開心，球員爭氣贏到銀牌，嚟緊要再接再厲。下年可以再戰亞協盃，希望大家繼續努力，為自己、為晨曦、為香港足球爭光。無論我幾忙，我都有留意晨曦嘅報道，球隊第一年用我牌頭（即JC）就攞冠軍，我好開心！」
有機會跟國際巨星成龍「零距離接觸」，晨曦眾將興奮度爆燈，「亨利」鄭少偉都唔放過機會，跟住羅拔圖、米路雲洛域，與「大哥」合照，「亨利」話：「感覺好Warm，知道成龍大哥有支持球隊，但佢咁忙，所以今晚都係第一次同佢見面，佢好友善又冇架子，希望遲啲佢會有機會入場睇我哋比賽啦！」
晨曦教練列卡度在會方派發銀牌冠軍獎金時，不忘勉勵各位愛將：「雖然贏咗銀牌，但球季尚未結束，我哋仲有聯賽前四同足總盃兩個任務要達成，大家畀心機，到球季完咗至盡情慶祝！」
晨曦將於下周四應贊助商日之泉之邀，北上廣州作親善訪問，翌日友賽廣東日之泉。