【本報綜合報道】在明星賽被韋迪打爆鼻兼出現輕微腦震盪嘅高比拜仁尋日帶傷上陣，戴住「鬼面罩」依然着火轟入31分，領湖人以104比85大勝木狼。高比仔賽後大嘆戴罩辛苦，仲話好似焗緊桑拿咁。
雖然賽前一直盛傳高比仔因腦震盪倦勤，但後者一向有「鐵仁」之稱，只要打得都會堅持上陣，結果佢就戴住「鬼面罩」見球迷。高比仔可謂極速適應保護罩，首節已射入10分，另外全場貢獻31分、8次助攻及7個籃板，表現神勇下領軍贏波。
高比仔賽後表示：「戴罩真係好焗好辛苦，感覺好似焗緊桑拿一樣，我今場都唔知飲咗幾多自己嘅汗水，好嘔心！」此外，高比仔亦透露自己已經冇再頭痛，令湖人球迷放下心頭大石。