Pinky & Ivy 玩轉明星賽

正常嘅三分賽，當然係喺三分線前跳射先算數啦，但原來兩位靚女主持一向打開內線，好少射三分波，所以就允許佢哋移前到籃底先起手。正如射十二碼一樣，射先一方永遠有着數，Pinky射5球中3球，命中率真係高過「浪射王」高比拜仁o架；反觀短頭髮嘅Ivy第一嘢已經整個空氣波，5球入得1隻，一個字，曳！

擔梯入樽 喜感十足

第二回合技巧賽，NBA嗰邊就要上籃呀、扭雪糕筒呀、射罰球呀咁，我哋當然係另類技巧賽啦，首先要原地轉三個圈，之後鬥快去到籃底「達陣」，期間仲有我法比加輝飾演猩猩王阻撓兩位索女。先玩嘅Pinky轉完圈都已經冇晒力，加上佢見到我又有多少怯怯地，結果搞咗一輪先「達陣」。反而Ivy今鋪爭番啖氣，趁球證見唔到嘅時候出茅招推開我，想唔贏番次都唔得啦。

兩位靚女打成一比一平手，想唔到要用最殘忍嘅入樽賽去決勝負，今次我哋就請來閱女無數嘅「東方錢國偉」邊爐子文來評分。嘩，Ivy入樽前先嚟一個插花，果然有心思，然後再上梯入樽，可惜佢「上籃」扮入樽，錯晒，但評判邊爐哥依然舉牌畀六分，喂大佬你當呢度係《美女廚房》咩。

Pinky就犀利啦，先倣效上季「入樽王」格芬跳過架車，就地取材跳水樽，之後再加個轉身先上梯，誠意十足，雖然最終都係亂射唔係入樽，但邊爐哥認為佢跳水樽一下已經夠贏，最終畀七分，令Pinky以總回合二比一，贏得首屆《球愛籃球大作戰》冠軍。