年度盛事入樽賽周日殺到埋身，戴歷威廉士、布丁加及保羅佐治連日來絞盡腦汁度橋，務求以出位招數「Dunk場」爭奪入樽王寶座。當中火箭前鋒布丁加最有計，竟然計劃飛過「移動長城」姚明飛身鋤樽！
日前火箭新秀柏臣斯喺本田中心球場受訪時，隊友布丁加恰巧在場苦練入樽，該名前鋒更搬出1個2.26米高、1:1嘅紙板姚明作為障礙，飛身跳過「小巨人」頭頂鋤樽，噱頭十足。早前姚明就透過Twitter恭賀這位布丁加入選入樽賽，美國傳媒更估計「小巨人」或會成為入樽賽嘅神秘嘉賓。
另外，由於紐約人新秀森柏特因膝傷退賽，意味原先計劃助陣嘅林書豪冇望亮相入樽賽，不過J.Lin隨時「跌咗個桔執番個橙」，事關鷹隊球星祖莊遜因傷或缺席東西岸明星賽，有消息指聯盟正考慮補選林書豪或狀元艾榮入伍。此外美國男籃贊助商尋日公布了「夢幻隊」新戰衣，勒邦占士、高比拜仁、杜蘭特及迪倫威廉士都成為了Model。