林書豪嘅「連爆」，似乎已將其他球員在上半季嘅努力一下子抹去，當中「受害者」必數今場對手勒邦占士。「大帝」剛被《體育畫報》選為上半季MVP，七位負責評審嘅專家全數投佢一票，可惜人氣及鋒芒卻完全被J.Lin蓋過。
隨着高比拜仁走下坡，戴歷羅斯又常受傷患困擾，「大帝」今季重奪MVP嘅呼聲可謂高唱入雲，可惜無論占士如何大勇，人氣都係及唔上「瘋」頭躉J.Lin。據Google最新統計數據顯示，截至2月22日為止，關於林書豪（Jeremy Lin+Linsanity）嘅全球搜尋次數為4億2425萬次，呢個數據已經遠超「波神」米高佐敦嘅3億次，至於足球巨星碧咸（1億5800萬次）及C朗（1億2300萬次）更加大幅落後。
事實上，林書豪係虔誠基督徒，乖乖仔謙厚形象得人鍾意，但占士出道以來都囂張跋扈，以「皇帝」自居惹人生厭，受歡迎程度自然難及J.Lin。中港台明星如「黑人」陳建州及余文樂都常在微博中留言支持林書豪，而外國藝人Jay-Z及Beyonce更入場撐J.Lin，與常被網民指罵嘅占士形成強烈對比。