羅意庭爆肌10磅上位
相傳食咗「爆漿瀨尿牛丸」會明顯大隻咗，自信心返晒嚟，但世事邊有咁筍？今晚會喺CBA季後賽領導福建潯興、開創首個港人打CBA季後賽歷史嘅「彈弓人」羅意庭，呢兩年為爭正選適應內地硬淨打法，無間斷咁操肌肉，終於有今時今日「大隻羅」嘅成績，真係一啲都唔簡單！究竟呢10磅肌肉係點樣練返嚟？繼續睇咪知囉！
比起上季「一年生」只得一場正選，阿庭今季卻有26場首發，足見佢為爭正選控球後衞而下嘅苦功，佢就話：「喺內地打波最重視對抗性，所以上到嚟首要係操大隻啲！為咗咁，我每朝早餐都強迫自己狂啪烚蛋白，做完兩個鐘健身之後就飲大隻奶粉，結果一年就練咗10磅肌肉出嚟！」
多得新帥斯蒂賓賞識
不過，阿庭話真正令自己硬淨起嚟，反而係練波嘅碰撞：「呢度比賽時已經好硬淨，但訓練時會更硬。因為教練想我哋習慣畀對手犯規都可以入波，博到『foul count』，所以練波時畀人撞到瘀晒係好平常。加上我隊波有個外援後衞安東尼，我就試過畀佢撞到『炒芥蘭』，抖咗幾日先好番，咁嘅情況自己唔硬唔得！」
CBA季後賽第一港人
由上季大後備變成依家必然正選，阿庭話要多謝教練斯蒂賓賞識：「上季自己滿有信心挑戰CBA，卻坐咗成年冷板，加上球隊成績差，老實講真係好灰，唔應該係咁樣；到咗今季球隊有新教練斯蒂賓，佢睇中我嘅防守腳步夠快，跟得上啲外援，就搵我打正選，亦畀我唔少鼓勵。為咗報答佢，我每場波都搏到盡！」阿庭能夠成為第一位打入CBA季後賽嘅香港球員，仲要係以正選身份做到，「大隻羅」真係吃盡苦頭，得來不易o架！
圖／文：司徒子文