黃興桂率荃灣提早封王
「金句王」黃興桂（Peter）今季出山重執教鞭，率領地區球隊荃灣參加丙組地區聯賽，球隊喺桂神嘅神級領導下，季初至今保持不敗，昨日作客對排尾二嘅北區，喺傳媒見證下以0比0同對方握手言和，結果以12戰9勝3和得30分嘅不敗成績，拋離次席嘅黃大仙11分，提前兩輪登上丙組地區冠軍寶座。
專注體能紀律同防守
黃興桂有句金句「蔗渣價錢，踢出燒鵝味道」，喺佢帶領下嘅荃灣，亦係拉雜成軍踢出好成績，Peter表示，今季以一班冇名氣、最初連波都唔識踢嘅年輕人，取得不敗成績封王，令身為教練嘅佢特別有滿足感。
佢話：「今季我同侯耀彬及劉寶華兩位教練一齊帶隊，我哋分析過，班球員基本功唔掂，執行唔到戰術，因此我哋只專注做三件事，就係體能、紀律同防守，結果非常成功。」佢仲話：「當然奪標過程中帶點運氣，但都要多謝一班球員努力。」
Peter話，最後兩場希望球員努力完成，保持不敗就最理想，以最佳狀態迎接季尾嘅升班附加賽。至於昨日未能擊敗北區，可能因為有傳媒到場，令球員心理壓力大增有關，佢話：「踢波就係咁，你愈想去贏，反而會贏唔到，不過和波都夠啦，至少冇令前來採訪嘅傳媒撲空。」