相信最近呢個零禮拜，Facebook畀兩個人瘋狂洗版，一個係林書豪，另一個係唐英年。而將兩個人喺呢一周發生嘅事件嘅時序夾一夾，又睇到啲幾得意嘅嘢。
2月10日：港大民調顯示，唐英年嘅支持率跌到27.8%，無因為梁振英「西九事件」而得到任何甜頭；同日，連續3場入咗20分嘅林書豪正準備同湖人隊比賽，十幾個鐘頭後佢射入多過高比嘅38分，除帶領缺少兩大巨星嘅紐約人4連勝外，正式宣布「林瘋」熱席捲全球。
2月13日：唐生被傳媒踢爆大宅僭建，但佢回應係「掘深咗」；同日，林書豪勇士球衣鹹魚翻生，原價600蚊一件，被炒高至2,000蚊仍然大把人搶。
2月15日：唐生出席政綱發布記者會時承認在僭建醜聞上「有不可推卸嘅責任」，但死口唔認係存心隱瞞；同日，林書豪最後0.5秒射入絕殺3分波，以行動證明「做男人真係要有膊頭」。
2月16日：唐生「成功」拆彈，將僭建一事全部推畀枕邊人郭妤淺，擺老婆上枱，唔少市民透過瘋傳惡搞圖片發洩不滿；同時，有消息傳出片商決定將林書豪嘅成功故事拍成電影。
短短一周之嘛，林書豪由爭啲畀人炒嘅二打六變為全球巨星，而唐英年由特首大熱門變成過街老鼠，起落之大確實令人嘖嘖稱奇，而且箇中有好多嘢好值得大家反思。
台灣《美國職籃》專欄作家邱益忠，自初中起不自禁地戀上NBA，對每支球隊有着獨特見解，以風趣幽默形式同你論盡NBA！