紐約人明早會作客對速龍，不過連爆五場嘅林書豪，可能要將「領袖」位置讓番出來，皆因「A米」史杜迪米亞已經搞掂家事回歸，教練迪安東尼賽前表明會復任「A米」做正選，紐約人陣容增強相信可延續連勝。
（now 635周三早上8時直播）
之所以出現「林瘋」熱潮，主因就係紐約人兩大球星史杜迪米亞同「甜瓜」安東尼齊齊缺陣，冇人孭飛下成就了林書豪上位，兼造出了今季最長連勝紀錄5連勝，所以唔少球迷都講笑話，「A米」同「甜瓜」回歸都唔好出佢哋！
不過教練迪安東尼賽前表示，唔擔心佢哋同林書豪唔夾，而中鋒贊特拿更鬧球迷「天真」，佢話球隊仍然好需要「A瓜」兩人，而林書豪則係一個好控衞，所以球隊將會更加強大。
另一方面，灰熊食正情人節條水，特別印製5款情人節卡並於主場免費派發，五位球星馬克加素、康利、基爾、美奧及東尼阿倫齊齊着上紅色樽領衫，並配以心形圖案兼愛的宣言冧fans，真係夠晒溫暖。