林書豪神奇梳化網上任Bid

【本報綜合報道】「大紅人」林書豪（Jeremy）成名之後遭瘋狂「抽水」，早前借張梳化畀佢瞓嘅隊友菲爾斯，日前就在twitter上載「神奇梳化」嘅真身，仲打趣叫人出價競投！至於Jeremy高中教練施里頓亦唔執輸，呢位老兄一早預計愛徒爆發，所以2010年已經買下兩個有關「林瘋」嘅網域名，依家賣番出去肯定賺大錢。
林書豪
林書豪

現年45歲嘅施里頓係林書豪高中時代嘅教練，當時佢已經知道Jeremy非池中物，所以在林書豪於2010年登陸ＮＢＡ嘅時候，決定買下兩個網域名「Linsanity.com」及「TheJeremyLinShow.com」，等佢爆發嘅時間，網域名升價而賺大錢。估唔到只係等咗兩年，「林瘋」（Linsanity）熱潮真係發生咗！

林書豪細佬Joseph（左）係大學籃球隊主將。
  • 林書豪細佬Joseph（左）係大學籃球隊主將。

獲歌手作曲歌頌

施里頓接受《紐約郵報》訪問時就話：「林書豪高中時已經好特別，有能力控制戰局兼扭轉劣勢，具備成為巨星嘅潛質。」至於讓林書豪借宿一宵，畀張梳化佢瞓嘅紐約人射手菲爾斯，日前就為呢張「神奇梳化」影咗張沙龍，然後放上twitter公開「真身」。其實呢張咖啡色梳化尺碼頗細，身高６呎３吋嘅林書豪應該都要屈住嚟瞓，不過單係「林瘋」瞓過都升價十倍啦！所以菲爾斯就打趣話：「大家請出價吧！」另外一位Rapper Mega Ran亦親自Rap歌歌頌林書豪。

睇細佬比賽惹騷動

林書豪尋日唔使打波，所以就同埋父母一齊睇効力咸美頓大學嘅細佬Joseph比賽。由於Jeremy已經成為全美紅人，所以佢今次睇波都引來校內騷動，學校仲要專登搵學校警衞「護駕」，全程陪住Jeremy一家睇波，地位拍得住勒邦占士。

賽事方面，湖人尋日有高比拜仁攻入27分，率領湖人作客以94比92險勝速龍。賽後《ESPN》爆料，稱「紫金兵團」有意羅致36歲嘅艾佛遜，大前提係「戰神」要到發展聯盟（NBDL）征戰兩周操起狀態。