綠軍擒貓再襲湖人
【本報綜合報道】塞爾特人老臣子「PP」皮雅斯昨日在山貓身上取得15分，累積為「綠軍」貢獻了21,797分，超越名宿「大鳥」布特，升上隊史得分榜第2位。皮雅斯寫下里程碑之餘，同時亦領塞爾特人以94比84輕取山貓，取得今季常規賽首次5連勝，「綠軍」目前狀態大勇，明早繼續於主場狙擊宿敵湖人。（now635周五早上9時直播）
破大鳥史上第2紀錄
「綠軍」近期氣勢如虹，昨日面對山貓，幾位巨頭繼續交足功課，加納特攻入最高22分及7個籃板，朗度就貢獻10分及14助攻，至於焦點人物皮雅斯交出全面數據15分、8籃板和9助攻，領「綠軍」由頭帶到尾贏波。今場已經係皮雅斯第985場為塞爾特人上陣，累積攻入21,797分，成功超越「大鳥」布特21,791分，成為隊史2號得分王。不過佢想攀上首位似乎就有啲難度，事關名宿夏夫列錫累積得分多達26,395分，34歲嘅PP可能要打多3季先至有機會挑戰呢個紀錄。
塞爾特人贏波後5連勝，狀態明顯較下場對手湖人勇銳，尤其「紫金兵團」今季作客成績不濟，12場作客輸咗9場，因此「綠軍」小讓2.5分底下，上盤相當值博。
大戰前夕又有傳聞指塞爾特人對湖人前鋒加素有意思，並願意以朗度作為籌碼交易，由於湖人一直都想搵個星級控衞，所以呢單交易絕對有偈傾。
快艇比立斯重創收咧
另一方面，湖人同市球會快艇嘅老將比立斯，早前對魔術勇戰傷出後，已證實左腳筋腱撕裂要長抖8個月，意味呢位老將今季將提早收咧。不過35歲嘅比立斯表明唔會就此退休，佢認為自己仲可打多幾年。