羅斯淚灑更衣室 臨尾失準慘負熱火
ＮＢＡ尋日爆發東岸榜首大戰，公牛未能報回上季東岸決賽出局之仇，戴歷羅斯尾段連番失機下斷送追平機會，終以93比97不敵熱火，難怪賽後傳佢喺更衣室自責並灑下男兒淚。不過公牛輸波真係唔怪得人，點解？連布沙個仔都手指拗出喺場上幫熱火打氣，佢老竇又點會打得好呢！
戴歷羅斯今場孭重飛打足45分鐘，起手28次入11球得34分，但「毒玫瑰」竟然喺最尾先嚟手軟，賽事剩餘22秒佢兩罰全失錯過反超前機會；去到最後3秒硬闖上籃又「炒粉」未能助公牛追平，想唔孭鑊都唔得啦！羅斯仔賽後極度自責：「係我令到球隊輸波。」不過隊友諾亞話唔會怪佢，仲話好欣賞羅斯仔呢份鬥心，因為對勝利執着嘅人先會懂得自責。
熱火「三巨頭」今場合共攻入74分，其中以勒邦占士最佳取得35分，而「大帝」今場更摘下11個籃板球。其實「三巨頭」的確魅力非凡，就連公牛前鋒布沙個囝囝睇波時都忍唔住幫「敵人」打氣，多次大叫：「Let's go Heat！」結果被攝影師捉個正着，布沙今鋪都唔知點面對班隊友囉！
湖人擒狼再捉貓
另一仗湖人則以106比101擊敗木狼，高比拜仁今場起手29次中14球得35分，職業生涯累積射入9,946球，超越名宿渣巴榮升湖人史上入球次數最多球員。湖人明日喺主場鬥山貓，小讓4.5分要捧上盤。（周三早上11時30分開賽）