去年密密執逾4億 高比膺吸金王
【本報綜合報道】儘管NBA去年陷入停擺危機，球員一度淪為失業人士，但停擺似乎影響唔到球星嘅吸金能力。財經雜誌《福布斯》昨日公布了NBA球員過去一年嘅收入排行榜，湖人當家球星高比拜仁在停擺期密密參加商業活動，結果賺得5,320萬美元（約4.1億港元），力壓勒邦占士成為NBA「吸金王」。
高比拜仁去年趁住NBA停擺期飛到歐洲多個地方如雅典及米蘭等，出席贊助商所舉辦嘅商業活動，冇波打照樣「袋袋平安」。其實高比仔未婚變前形象健康，深受商戶歡迎，如NIKE、Smart汽車、Panini及土耳其航空等贊助商都要搵佢代言，所以「小飛俠」去年賺取了約2,800萬美元贊助費，加埋佢份2,520萬美元「波糧」，順利榮升「吸金王」。
雖然「大帝」吸金少過高比仔，但論贊助收入，勒邦占士先係一哥！「大帝」嘅合作夥伴包括有NIKE、可口可樂、麥當勞、State Farm及Upper Deck等，而且佢在去年四月仲成為咗英超球會利物浦嘅小股東，單係贊助費已收取了3,300萬美元，占士以4,900萬美元（約3.8億港元）排第二，主要因為佢「波糧」較高比仔少。
湖人市值69億領群雄
至於球隊價值排行方面，由於電視轉播收入提高及剛簽訂了新勞資協議，令NBA球會市值創了史上新高，30支球會平均市值達到3億9,300萬美元（約30億港元），較去年增加了6.5%。其中湖人剛與時代華納簽訂一份為期20年嘅轉播合約，由2012至2013球季開始，湖人每年可獲得2億美元收入，因而令湖人身價暴漲40%市值達9億美元（約69.8億港元），擊敗紐約人成為最有價值球隊。