美國籃球隊主帥「K教練」克爾澤維斯基，早前表示打埋倫敦奧運就會辭去「夢幻隊」教練一職，「大帝」勒邦占士日前透露意願，原來佢最想馬刺教練普波維治接任帥印，領軍出戰2016里約熱內盧奧運。
勒邦占士認為，普波維治執教馬刺多年經驗豐富，最重要係佢帶領馬刺多次奪得總冠軍，功力夠晒深厚，絕對配得上當「夢幻隊」主帥。
事實上，普波維治早在04年已經同占士合作過，當時普帥充當拉利布朗副手領軍「夢幻隊」出戰雅典奧運，可惜美國當時以「青春班」應戰，結果僅獲得一面銅牌。除普波維治之外，紐約人主帥迪安東尼亦係接任「夢幻隊」大熱。