人生總會經歷年少無知的階段，雷霆「孖寶」杜蘭特及韋斯布克上季因爭寵間接令球隊未能行前一步成為西岸盟主。經歷失敗，還有停擺的噩夢，兩人回頭一看可能都會為無知而感到懊悔。其實杜蘭特的「內斂」與韋斯布克的「霸氣」是絕配，就如湘北流川與花道一樣，威力難以估計。
或許未必有人會想過雷霆可以拎冠軍，但事實上呢支年輕勢力實力正每季遞增，上季殺入西岸決賽，令小牛吃盡苦頭，絕對不能小覷。雷霆最大本錢係年輕，正當西岸豪強因老態已走下坡之際，雷霆就因為球員日漸成熟而愈變愈強，四名「88後」杜蘭特、韋斯布克、伊巴卡及占士夏登在這一兩年內瘋狂進步，早已成為老兵噩夢。杜蘭特係好會顧全大局的球員，佢季前率先表態百分百支持韋斯布克，甚至讓出「大佬」之位亦都唔介意，「孖寶」搵到方法並存，確實有權將一眾巨人球隊擊破。
至於另一西岸新勢力快艇亦令人充滿期盼，基斯保羅雖未能投效湖人，但加盟快艇可能會係更佳選擇，格芬及迪安迪佐敦都潛質優厚，CP3有了兩大幫手，未必無望冠軍指環。