屯門Iris & Minnie：本地波場場扯紅旗
要數一班港甲Babies當中，最有「美貌與智慧」嘅，曾經參選過港姐嘅屯門Iris一定有份！今日佢就會同拍檔Minnie，一齊到旺角場為屯門出戰高級組銀牌賽打氣，Iris就話聖誕願望想喺今後場場本地波都滿座：「今日如果有幾千人陪我一邊慶祝聖誕一邊睇波，咁就真係High爆咯！而紅旗高掛當然最切合聖誕氣氛啦，同時亦證明球市興旺，打氣都開心好多啦！」
買飛撐場最實際
至於青春無敵嘅Minnie就話，平安夜要做屯門「打氣Baby」，而聖誕正日就要做Model，兩個咁最重要嘅日子都要喺工作中度過，滿足之餘都幾開心，講到聖誕願望咯喎：「同Iris一樣，我都希望愈嚟愈多粉絲支持港甲，點支持？講係冇用嘅，最緊要係有實際行動，畀錢買飛，逼爆成個球場，咁就冇得頂嘞！」