任職空姐嘅Honey樣靚身材正，再加埋對足球嘅熱血，可以話具備晒做「女神」嘅條件！最近佢就幫朋友影咗輯靚相擺上網，「卡娃兒」之餘，仲引嚟網友Like爆。
問到有冇諗過入娛樂圈發展，Honey笑言有人提議過佢做「女版金剛」：「我講廣東話唔正，成日搞到笑料百出。就好似上次幫《東方》拍專訪，我將旺角場講成『望角場』，即刻畀人勁Forward出去，依家好多人見到我都唔嗌Honey，用『望角』嚟笑我！不過咁都好，起碼會令人開心，就好似嗰個新進主持金剛咁，講嘢唔正先引到人笑，相信我都有咁嘅天分。」