公牛孖寶贏波冧爆粉絲
儘管昨晚在澳門上演的「美國傳奇球星亞洲之旅─澳門站」雲集十多位前ＮＢＡ球星，但主角始終都係柏賓及洛文，這對「公牛孖寶」可謂寶刀未老，「二哥」柏賓剷籃、助攻、遠射瓣瓣有，年屆50歲的「變色龍」洛文雖然「跑唔郁」，但全場不斷送禮卻贏盡球迷呼聲。
表演賽於威尼斯人度假村金光綜藝館爆發，雖然有公牛王朝舊臣孭飛，但未能收爆棚之盛，但球迷見到球星進場依然情緒高漲，當中以洛文及柏賓最受歡迎，掌聲最多。
戲金乸脷冇欺場
洛文礙於體能問題跑動極少，下半場更幾乎冇落過場，不過「變色龍」每次Time Out時都有將簽名波鞋及波衫拋向觀眾席，認真識做！反觀46歲的柏賓的身形甚弗，多次轟入３分波又助攻助守，結果帶領摩西斯馬龍隊以143比139砌低由夏達威及佩頓領軍的阿治巴特隊。
賽事搞手之一吳先生（Rock）被問到球星戲金，透露柏賓及洛文的戲金為眾星之冠，價錢高到難以置信：「柏賓的戲金同邀請一名現役球星幾乎一樣，今次表演賽平手離場已好滿意。」他透露已計劃再次召集經典球星於明年４或５月展開中國站。