明年靠歐國盃波衫食胡
曼聯波衫周街有得賣，但球迷仍然鍾意去球衣專門店「尋寶」，皆因呢類店舖款式最快最新最齊，做得呢行當然熟晒行情，除咗大路豪門波衫，冷門球隊例如「拿玻里歐聯版波衫」都總有幾件看門口，專門店負責人Oku話：「就算曼聯唔掂，好彩2012年有歐國盃，明年上半年我哋呢行靠晒國家隊波衫食胡o架喇！」
國米戰衣滯銷要割價
以現時行情睇，今季暫時銷售成績最好嘅波衫，英超係曼城、意甲係祖雲達斯，西甲皇馬就有反壓巴塞之勢，其餘波衫銷量都好平均。
曼聯有大量死硬派擁躉撐住，即使成績回落，波衫都仲幾賣得，反而最失望係國際米蘭，Oku亦話跌眼鏡：「真係冇諗過佢哋今季咁差，雖然入少咗貨，但依家都要減價吸客，500零蚊買國米波衫送埋印字，即係每件計平兩舊水。」
2012年舉行歐國盃，球衣店都磨拳擦掌準備打仗，Oku方面暫時已有5件國家隊波衫上架，計為西班牙、德國、意大利、俄羅斯同主辦國之一嘅烏克蘭，Oku話：「烏克蘭波衫係專登運嚟香港賣，食住舒夫真高收山前最後一擊呢條水，相信會有一定吸引力，聽聞舒夫真高受咗傷，希望佢早日康復，養好身體踢歐國盃啦。」