「二打六」女網手搵到靠山一樣掂！「法國網壇花瓶」歌路雲多得曼城球星男友拿斯尼帶挈，做Model、拍廣告人氣高企，暫別網壇仍財源滾滾，「轉行」任WAG（球星伴侶）一樣竄紅，財路更多，事業更上一層樓！
現年23歲嘅歌路雲，堪稱網球壇甜姐兒，但出道以來成績唔算太標青，世界排名最高都係排過十二位，卻花邊新聞多多，主要原因當然係佢嘅曼城球星拿斯尼女友身份，令佢成人氣女王，隨時踩入藝能界！
俄羅斯出世嘅歌路雲，自小便隨家人移民法國，佢02年轉打職業網球賽，可惜一路發展平平，08年更因為傷患退出球壇。雖然歌路雲球技唔算出眾，卻因為標致外貌成為女神級球星，佢曾經話過唔介意球迷因為佢靚女而留意佢，不過希望球迷可多留意佢嘅球技，唔好成日追問佢同拿斯尼嘅戀情，為咗多啲時間陪拿斯尼，歌路雲近年更搬到英國定居。
其實歌路雲同拿斯尼戀情已有幾年，最初歌路雲以事業為重，冇公開承認拿斯尼嘅身份，大玩地下情，但退役後佢同拿斯尼嘅感情開始浮出水面，較多一齊公開亮相，更試過拍拖齊齊亮相電視節目添。歌路雲本身都係足球迷，所以成日都會為拿斯尼打氣，佢話唔介意做拿斯尼背後嘅女人喎，認真Sweet！
雖然依家唔打波，但歌路雲憑「拿斯尼女友」身份愈來愈受歡迎，佢亦好有善心周圍從事慈善活動，形象咁好當然紅透半邊天啦！喺09年，佢就同韓杜荷娃等網球美人，影性感泳衣相，開展模特兒事業，仲接咗好多廣告，人氣愈來愈勁，據講短期內仲會進軍電影界，第時搵錢分分鐘仲多過男友添！
年齡：23歲 專項：網球
身高：1米75 體重：60公斤
轉打職業年份：2002年
最高世界排名：12
職業賽錦標：2個
大滿貫最佳成績：美網8強(2006年)
威水史：2004年WTA最佳新人