日前有場學界足球決賽，搞到石硤尾運動場座無虛席，場面墟冚，波總主席拜仁梁亦有到場，佢見到如此場面，即場表示將學界波搬去旺角場，作為港甲頭場都唔錯，呢個構思甚有建設性，雖然執行起上嚟會有唔少技術性問題有待解決，但一切事在人為，只要波總牽頭，學界波都可以出得大場面。
本地波要提升青訓質素，同學界合作係一個好方法，至於點樣配合就係一門高深學問，以往波總同學體會各有各玩，令好多青少年到一定年齡，就要喺學業同踢波之間作出抉擇，未能做到學業與踢波並存。
學體會其實好歡迎波總幫手搞學界波，不過波總亦要識做，原來喺若干年前，學界波已經試過安排在港甲賽事踢頭場，但門票分配出現問題，學生太多門票唔夠分，但又冇理由要學生買票入場，本來一件好事搞到兩頭唔到岸。
波總現行售票政策係有一定數量特惠門票賣畀長者及學生，拜仁梁既然想學界波踩入旺角場，特惠票政策就有修改需要，先將長者同學生票分割，當有學界賽事踢頭場，就要開放畀學生免費入場。畢竟現時本地波嘅「學生客」數量唔多，改為免費入場對票房影響不大，至於康文署對球賽贈券比例有所限制嘅問題，就要由波總與康文署研究。
其實近年都見唔少「學界之星」喺港甲亮相，如果波總能與學體會衷誠合作，將學界賽事規格提升，開通學界進身港甲門路，咁至係波嘛！
波男