Talk得！睇得！踢得！胡心諾超級天才波

球愛敢死隊有一個優良傳統，就係上親嚟接受測試嘅都係大美人。而今次亦都唔例外，歡迎冬甩成員胡心諾（Rainbow）上嚟玩遊戲。從○八亞洲遊戲展去到美女廚房，唔經唔覺Rainbow已入行三年，期間經歷過唔少風風雨雨。雖云人言可畏，但Rainbow橫眉冷對千夫指，一於我行我素，我走我嘅路。如果Rainbow唔係咁有「吉士」，今日又點擔得起成為師姐級靚模。今次大師姐就同大家玩遊戲，考驗佢多方面嘅才能。

問Rainbow有冇興趣投身傳媒行業，佢就話有機會一定會試吓：「始終自己仲後生，嘗試唔同工作可擴闊眼界以及生活圈子。而且深入接觸唔同階層或者範疇，會對自己更加了解，對於往後發展一定有幫助。」

放大圖片	放大圖片	放大圖片

文鬥︰扮主播好專業

好多人都話靚模得個樣乜都唔識，但可以同你講Rainbow美貌與智慧並重，可謂非一般靚女。就好似文鬥環節扮主播，口齒伶俐唔在講，仲識對住鏡頭露笑容，呢啲咪專業囉！依家新聞主播都係走靚女路線，話知佢講嘢一舊舊，最緊要樣靚有款頭。

放大圖片	Rainbow通坑渠咁叻，巨高都睇到眼凸凸。

而Rainbow講得又睇得，絕對勝任做主播有餘啦！你話佢識諗又好識講嘢都好，對答完全唔似一個十九歲女仔。工作人員懷疑呢個小妹妹係資優人士，仲話如果下次佢再上嚟接受大測試，或者會畀個智力測驗佢試吓，初步估計智商同愛因斯坦差唔多。

武鬥︰通坑渠唔使NG

至於踢足球，Rainbow坦言唔多識。但大家要記住，呢個測驗唔係考班靚女踢足球有冇C朗同美斯咁勁，而係測吓佢有冇運動細胞。老實講句，通坑渠唔係咁易學得識，踢完個波仲要走位，手腳唔協調的話一定做唔到。

不過這位美少女只係睇我哋示範幾次就學識，仲叫工作人員行開，等佢做一次畀大家睇。果然一剔過冇NG，話佢冇運動細胞都冇人信啦！

圖/文：司徒子文