晨曦四子秋の放送
日之泉JC晨曦將於周日（27日）的高級組銀牌8強戰次回合迎戰和富大埔，賽事假旺角場上演，亦是晨曦與大埔一個月內第3度交鋒。「橙軍」晨曦在頭兩次對碰勝出，日前為球會官網拍攝贊助商秋裝照片的晨曦四子鄭少偉、黃鎮宇、卡爾及羅拔圖，異口同聲表示絕不敢看輕對手，勢必全力以赴爭入4強，希望球迷周日到旺角場多多支持！
黃鎮宇：留意高美斯
上場聯賽作客大埔，因為我哋之前停咗個幾兩個星期冇比賽，所以比賽狀態冇對手咁好，最後只能險勝1球。經過上星期嘅比賽，我哋狀態有所提升，加埋呢次係我哋主場，草地質素靚咁多，我哋贏波嘅把握應該大啲啦！雖然我哋首回合領先，又有兩個作客入球喺手，但都唔可以鬆懈，畢竟大埔嘅快速反擊出名勁，高美斯最值得留意。
羅拔圖：球迷支持乜都唔怕
上星期聯賽我哋作客，憑住大家努力，同埋守門員侯宇神勇演出，勝出漂亮一仗，我希望嚟緊大家可以交出比上星期更高水準，力保首回合優勢晉級4強。對手方面，最具威脅肯定係安基斯，佢真係睇少眼都唔得架！不過，只要有多啲球迷入場支持，就乜對手都唔怕啦！
鄭少偉：嚴防安基斯
我哋唔會因為首回合作客贏咗，嚟緊呢場就踢守勢波，會照舊採取主動！大家連續對咗兩場，彼此都摸清踢法，但因為旺角場草地質素靚好多，我哋臨場發揮應該會比之前兩場作客好。大埔陣中最危險人物係安基斯，佢把握力好強，一定要嚴防！
卡爾：兩場硬仗後又一硬仗
在我嚟講，今場只係兩場硬仗之後嘅又一場硬仗！冇錯，之前兩次交手都係我哋贏，但我依然覺得大埔係強勁嘅對手，因為佢哋有好多具質素球員，而且合作咗一段長時間，係一支好厲害、擅踢整體戰嘅球隊，不過，我對自己同隊友好有信心。
座枱月曆設計比賽 下周三就截止喇！
由日之泉JC晨曦主辦的「座枱月曆設計比賽」，下周三就截止，你參加咗未？詳情可瀏覽晨曦球會網頁：www.sunhei.hk，或電郵至alifejacket55@hotmail.com.hk查詢。
圖/文：戴陶蔚