在年終賽B組已鎖定出線資格嘅費達拿，昨趁着休戰特別帶埋老婆走到阿聯酋航空球場睇阿仙奴主場贏多蒙特嘅歐聯分組賽，同老朋友前法國足球名將亨利邊食熱狗邊睇比賽，相當「梳乎」。完場後亨利更帶同「費天王」到更衣室同「兵工廠」球員有講有笑，不少球員亦借機同呢位網球天王合照，反變為小粉絲。
費達拿本身都係一個足球迷，細個時都有踢波，而近期狀態「托弗」嘅佢在年終賽已贏兩仗篤定4強資格，休息日唔練波而走入足球場睇波，可見佢對爭標充滿信心。