早前奪得中國勞倫斯傑出貢獻獎時，用喬布斯名言「Stay hungry, stay foolish」勉勵大家的「籃壇巨人」姚明，果然對追求成功飢渴又賣力，最近升呢「品味達人」開設葡萄酒公司，而首瓶姚明紅酒將進行慈善拍賣，底價6萬元人民幣（約7.34萬港元），以姚明嘅「朵」相信一定Bid得好價錢。
宣布退役後嘅姚明呢頭返上海交通大學讀書，嗰頭原來已秘密搞葡萄酒公司，仲喺盛產頂級紅酒嘅美國加州納帕谷（Napa Valley）成立自己嘅酒莊，以姚家族葡萄酒業公司命名。
自2002年赴美打NBA後，西方嘅飲食文化影響着姚明，促使他產生將「好嘢」推介給中國同胞嘅念頭：「我相信美酒能將人聯繫一起，及將生活帶到一個更高享受的層次。」
作為國際特殊奧運全球大使，姚明決定捐贈彌足珍貴嘅首瓶姚明紅酒，於即將舉行嘅特奧慈善晚會上拍賣。據悉這款1.5升嘅特別版全球限量發行僅1,200支，售價約3,000多元人民幣，但今次義賣則起價6萬元，希望連同姚明捐出嘅其他物品，包括iShark服裝、專屬鞋楦、皮具及特別版手機等等，為特奧籌集更多善款。