【本報綜合報道】NBA停擺令今個球季凍過水，但超級籃球迷美國總統奧巴馬，就邀請到大批現役同退役NBA球星參與表演賽，據《ESPN》消息人士爆料，一大班球星下月12日會喺首都華盛頓打場慈善明星賽，為奧巴馬嚟緊嘅總統大選籌募經費造勢，新世代球星杜蘭特、基斯保羅同杜域侯活已答應撐場。
表演賽門票暫未公開發售，票價已定由100美元至5000美元不等，這場名為「奧巴馬經典籃球賽」，總統開到聲大把NBA球星幫手，據講現役球星嘅杜蘭特、基斯保羅、杜域侯活、卡特同巴朗戴維斯已答應參加，退役球星中暫以莫寧知名度最高。
另一方面，網站《HOOPSHYPE》發起投票「你最希望邊個NBA球星去你國家打波」，結果高比拜仁以36.5%高票當選No.1，跟住係魯域斯基、戴歷羅斯、杜蘭特同韋迪，「大帝」勒邦占士得5.8%得票率排第6位，輸畀高比幾條街。