代表香港出戰滬港球會盃嘅和富大埔，次回合變陣失敗，未能收復失地之餘，仲衰多兩錢，作客遭上海東亞蹂躪輸一比七，兩回合合計以三比十大敗失落錦標。
大埔首回合主場僅負二比三，今場變陣改踢五後衞欲鞏固後防，卻告錯漏百出，上半場已慘吞五蛋。教練張寶春換邊後即轉陣，抽走史建威及上半場毫無建樹嘅巴西前鋒烈馬，表現總算有改善，並在七十四分鐘藉葉佳射入十二碼破蛋。可惜大埔尾段又試唔集中，完場前被戰怡麟連入兩球，大敗一比七結束上海之旅。
張寶春賽後指出，大敗主要因為球員唔夠集中，早早失守令球隊洩了道氣，但佢亦明白內地球員無論速度及身體質素都較香港球員強，所以輸波亦屬合理戰果，香港要追貼距離首先要做好青訓。
至於大埔中場呂志興就透露，雖然大敗仍感高興，事關出外比賽能夠學習外隊踢法，並且體驗到內地球隊嘅高速進攻，總算係一次好好嘅經驗。