【本報綜合報道】好多人都知荷里活影星湯漢斯係英超球隊阿士東維拉球迷，佢最近就話如果有空閒一定會親身飛去英格蘭，睇番場維拉嘅比賽。原來美國加州嘅維拉球迷組織，每年都會寄新會員卡畀湯漢斯，而佢更加係加州支部嘅榮譽會員。近日湯漢斯就向球迷組織回覆，話有機會就會飛去現場為愛隊打氣。
湯漢斯曾經喺電影《韋氏風雲》嘅首映禮中戴住阿士東維拉圍巾，球迷身份正式被「確認」。其實有唔少電影界名人都係英超迷，好似奧斯卡影帝哥連卓夫、名導演兼演員奇雲高士拿都係阿仙奴球迷，演員森姆積遜及安祖蓮娜祖莉就係利物浦粉絲。靚仔演員祖狄羅一向都係足球發燒友，所支持嘅球隊就係熱刺。至於經常喺愛華頓觀眾席亮相嘅演藝名人仲有史泰龍。英超賽事廣受世界各地球迷歡迎，有荷里活影星支持都好正常啫！