Honey文鬥佢最醒
球愛敢死隊出動！體育版「優質雄性動物」接受號召，組成一支史無前例兵團，走訪娛樂圈及各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
俗語有云隔籬飯香啲，台妹在港男眼中永遠都係巴塞隆拿，溫柔體貼可愛識氹人識化妝笑容滿面身材夠辣而且歡迎你欣賞，讓港女球半都照開上盤。正宗台妹公民啦啦隊隊長Honey，今季單挑多名港甲Babies，硬件唔輸蝕之餘，勝在夠Heart真心支持，試問有邊個寶貝會唔收錢打氣先得架！
相信唔少港甲迷都知，Honey當初加入公民，主要因為同球員馮啟匡Friend底，一心只係入場撐老友，殊不知愈睇愈上癮，真真正正做咗公民死忠粉絲。事實上，Honey確係非一般Babies，皆因佢除咗睇得之外，仲堅對足球有認識，細細個在足球強國阿根廷長大，睇波多過我哋睇TVB，識多國語言，做過巴拉圭靚仔前鋒辛達告魯斯嘅翻譯，呢啲經驗絕對唔係人人有，對南美波唔多熟悉嘅加輝，都要叫Honey一聲師傅。
控球三式快上手
今次為Honey而設嘅文鬥部分，佢可說贏晒之前好多喺「球愛」出現嘅靚女，叫佢試講出三名南美球員，佢可以喺一分鐘內噏到十幾個，唯一答錯嘅題目，亦只係唔知朗尼老婆係乜水，可見Honey都係一名熱血球迷，只係較少留意啲花邊新聞啫。
至於武鬥，Honey就稍為輸蝕啦，雖然佢喺足球強國長大，但話晒都係女仔嘛，所以發育之後都好少再同同學仔踢波，十幾年冇掂足球，就算係馬納當拿都唔記得點踢啦！好彩Honey話晒都係飲布宜諾斯艾利斯嘅水大，始終蘊含南美球員對足球敏銳嘅特質，加輝教佢「控球三式」好快上手，實在始料不及。查實台灣女足近年都有復甦迹象，甚至已有球員外流西班牙球會踢職業波，話唔定Honey都可以同佢班姊妹一樣，當上足球員喎！