今季本地波推陳出新，最近又有新搞作，就係香港體育記者協會主辦嘅「每月最有價值球員獎」，由本地傳媒選出港甲每月最佳球員，首月得主係天水圍飛馬嘅高梵，呢個獎項嘅設立確實值得一讚，除咗可鼓勵表現好嘅球員，更可吸引球迷嘅注目，可以話一舉數得。
搞波點先可以有聲有色？最緊要有Noise嘛！而呢啲選舉，就係最好不過嘅宣傳伎倆，因為但凡選舉總會有唔同聲音，有人覺得高梵表現好啲，亦有人覺得晨曦嘅「亨利」應該獲獎，有人討論先受到注目，無論邊個攞獎，都達到預期嘅宣傳目的，最終大家都係大贏家。
其實呢啲每月之星嘅選舉只係基本嘢，好似英超都有每月最佳領隊同每月最佳球員，NBA亦有每周之星，波男真係唔知點解港甲搞咗咁多年，到依家先有類似嘅選舉，但正所謂有心唔怕遲，希望搞咗呢個選舉之後，會更多人留意港甲，最緊要唔好三分鐘熱度，搞一季就玩完！
波男認為足總應該將呢個獎項推而廣之，除咗每月之星，再搞埋每周最佳陣容，甚至好似德國足球雜誌《踢球者》咁，每場波為球員評分，雖然呢類評分一定有爭議，亦未必公平，但肯定能引起回響，亦容易製造「球星」，最好遲吓足總網站效法歐洲足協官網，提供多啲球員嘅統計數據，咁先夠Pro架嘛！
波男