韋史密夫打救76人

76人易手後開記者會，喺發布嘅股東名單，赫然見到韋史密夫同老婆嘅名。其實早於06年，韋史密夫已想做76人老闆，原因係當時美國重量級音樂人Jay-Z已成為新澤西籃網嘅股東，而擅唱Ｒ＆Ｂ嘅Usher亦買下部分克利夫蘭騎士嘅股份，當時韋史密夫已曾公開表示，想入股76人，但一直苦無機會。

奧尼爾搵姚明拍電影

不過，隨着次按泡沫爆發，多支ＮＢＡ球隊都出現虧損，包括76人在內已蝕到入肉，不得不搵新老闆支持，韋史密夫同億萬富翁哈里斯就合組財團成功收購。

當地傳媒更指，韋史密夫此舉有另一目的，就係挽救同太太珍達娉琦臨近破裂嘅十三年婚姻，因為盛傳珍達娉琦搭上「籮霸」珍妮花露柏絲前夫，令兩者婚姻亮起紅燈，更因此秘密離婚，但韋史密夫同老婆齊齊投資76人，讓謠言不攻自破。

講開ＮＢＡ，嗱，呢頭有明星入股球會，嗰頭有退休球星想拍戲喎，正喺中國訪問嘅奧尼爾，話依家正同姚明聯絡，希望憑住兩人嘅人氣，拍番套戲進軍電影圈，一嘗表演欲之餘，又可以拍住搵真銀。