港欖孖寶成基發圍
香港欖壇兩位猛男姚錦成（阿成）及范信基（基仔）呢對「凹凸兄弟二人組」，由於睇準欖球服務喺香港有市場，於是膽粗粗創業，合資開設專業欖球公司，搖身一變成打波、教波同做生意嘅「三棲大忙人」。由於二人性格一凹一凸，踩過界做生意卻擦出意想不到新火花，今次兩兄弟誓喺商場達陣，齊齊上位！
以「菠蘿頭」成為港欖隊「icon」多年嘅「基仔」范信基，說話夠晒「招積」，坐喺辦公室內接受訪問時擺起個老細款，更最愛「窒」細佢4年嘅「阿成」；偏偏「阿成」又夠老實敦厚，被窒到「口啞啞」亦一笑置之，最難得嘅係，呢兩位「凹凸隊友」合作搞生意又幾有紋有路。半年前一次忽發奇想，基仔突然希望開一間欖球公司，更自創「4touch」訓練方法，改善目前於中、小學流行但缺乏基礎的「Try Touch」訓練，同姚錦成「傾傾吓」後，就將奇想付諸實行。
基仔同阿成一動一靜，問基仔點解搵呢位港隊隊友做拍檔，他話全因對方好得閒：「最重要係佢無嘢撈，一定有時間，哈哈！」二人今年7月榮升老闆，各自投資5位數字資金成立「4touch」欖球公司，專為學校同商業機構提供專業欖球訓練、另外又賣吓「拉筋帶」同自家設計波衫：「其實係我同佢都有共同理念，想幫香港培訓一班運動員接我哋班。」基仔補充話。講到創業，基仔話：「好彩一開頭就有一定嘅人際網絡支援。當然，由資料搜集，到設計、生產，上廠睇辦，一切都要親力親為，最難反而係做熟人生意，不好意思收得貴嘛！」阿成又補充：「我哋嘅賣點係要幫到人，希望平時少做運動嘅香港人可以多用拉筋帶放鬆，唔係一味只為賺錢嘅。」
望半年回本發大嚟搞
一個精靈，一個老實，分工起來卻各有所長。擁有「Man爆」鋼條身材的大隻仔阿成，正好可做產品嘅示範Model。加上工作時間有彈性，佢就負責見客傾生意呢啲對外事務。至於啱啱轉任欖總地區發展教練嘅基仔由於學過美術設計，所以主力幕後策劃、設計波衫同宣傳。一個願打一個願捱，不再僅用於情侶身上，兩位「凹凸兄弟」正以這道理才得以於商界大展拳腳，更期望半年內就回到本，更有計劃擴展業務到外國作拉筋帶加工，實行將盤生意發大嚟搞。
圖／文：Vien、徐飛