當今足球壇最受歡迎嘅教練，首推「寸王」莫連奴，球迷鍾意佢有料有性格同有吉士，去到邊贏到邊寸到邊，其實我哋香港足壇以前都有位「寸王」，佢就係上月走咗嘅牙擦教練吳偉文，不過由於年代久遠，年輕一輩球迷未必知佢啲威水事迹咯。
外號吳飛嘅吳偉文，我哋後輩都會叫佢一聲飛哥，大家都知以前香港足運非常興旺，球員時代嘅飛哥，代表中華民國出席1960年羅馬奧運，掛靴後跟隨西德名師克藍馬學法，曾三度執教南華，1977至78年曾帶領球隊以不敗成績聯賽封王，93至94年球季最後一次上山就協助南華擊敗巴西勁旅聖保羅。
球迷成日話莫連奴點寸點寸，其實當年嘅飛哥仲寸，以前香港球圈咁熱鬧，好多時就係多得飛哥得閒寸番兩句，搞吓氣氛，球隊之間有牙骹味，球迷睇波先至夠過癮。
依家嘅球圈環境已經唔同晒，球隊賽前好多時傾向低調，教練圓滑，即使球隊之間暗地裏勾心鬥角，大家表面上都係客客氣氣，贏波一方好多時仲會向對方講句「唔好意思」添。
自從飛哥退隱後，香港球圈再冇另一個牙擦教頭出現，球賽冇話題冇人談論，氣氛總係差啲，不過依家啲波同以前差咗一截，球員控個波都未控得掂，做教練嘅頭都痕埋，仲邊度得閒做「寸王」吖。
波男