波總委託國際獵頭公司全球招聘港隊教練，已進入面試階段，其中一位候選人Brian Eastick來頭唔嘢小，佢係英格蘭U20領隊，據講波總依家仲有幾個候選人咁多添，反應咁熱烈，莫非港隊教練呢份工，真係咁筍？
熟悉香港球圈運作人士都知，港隊教練絕對唔係筍工，有時仲係三煞位添，李健和曾經以「三無教練」嚟形容港隊教練，就係無權選人、用人、換人，結果真係畀佢講中晒，近幾年嘅港隊教頭，不論黎祥、高能、阿Kim同招積，都遇到同樣情況。
波男打聽過，Eastick好重視U15以下梯隊，而佢對球隊操練有好嚴格嘅要求，好重視球員態度同紀律，細微到幾時飲水都要執到正。
波男絕對相信Eastick有能力搞好港足，改善港隊嘅作戰能力，但就想像唔到佢一旦做咗港隊教練，將會面對嘅情況，例如和仔所提出嘅「三無」問題，佢會有乜嘢辦法去解決呢。
波總正與幾位候選人進行面試，講真，呢班候選人教唔教得掂，關鍵在於港隊教練到時有幾多實權喺手，佢想做嘅嘢，到時有冇人配合啫。
波男