屯門Babies 波事無雙 OneTwo撞牆 地上最強
球愛敢死隊出動！體育版「優質雄性動物」接受號召，組成一支史無前例兵團，走訪娛樂圈及各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
今期「球愛敢死隊」好榮幸，邀請到屯門足球隊一對靚女Babies上嚟，接受我巨高嘅文武大測試。好多人都話三個女人就一個墟，但當認識咗Iris同Minnie之後，你就知道兩個女人一樣可以成個墟咁。兩個靚女表面睇落斯文，原來蘊藏無限體能，長期處極度亢奮狀態，唔怪得佢兩個平時喺球場嗌足90分鐘都冇問題啦！咁究竟Iris同Minnie仲有乜鮮為人知嘅秘密，睇埋落去你就知。
講波純熟 夠料做主播
足球寶貝呢份工好蝦人打，唔單止要識波，喺球場仲要識得搞慶個氣氛，令球迷更易投入於比賽當中。而對鏡頭又要夠敏感，絕唔可以怕醜耷頭又垂手。而上述種種要求全部都難唔倒兩位屯門Babies。
好嘞，文鬥開始！今期我哋玩講波，試吓Iris同埋Minnie對本地波嘅認識之餘，仲想試吓屯門Babies係唔係咁口齒伶俐。大家咪以為佢兩個淨係識大叫大嗌，揸住支打氣棒係咁扑，其實兩位靚女好識波，唔單止熟悉屯門球員，就連其他本地球員都有一定程度了解。講真，如果佢哋唔做Babies，轉行做體育新聞主播一樣冇問題。
巴塞式短傳 似模似樣
睇佢兩個跳跳紮冇時停，武鬥對屯門Babies嚟講簡直係「依絲執」。既然有兩位靚女上到嚟玩遊戲，今次武鬥就打孖嚟玩One/Two撞牆。撞牆呢家嘢真係唔可以亂玩，一唔小心撞牆就會變撞板。而經過簡單講解後，兩位靚女好快就「上腳」，你交波我走位，直情有地上最強嘅巴塞隆拿嗰陣地面推進咁犀利！令向有「東方沙維」稱號嘅巨高都要寫個服字。
呢個世界有唔少好動嘅女仔，但又靚女又識波，仲要玩得兼識得搞氣氛，相信搵勻成個太陽系都係冇幾多個。屯門Babies絕對係人間極品，屯門有佢哋幫手打氣，落到場都醒神好多架！
圖：司徒子文