近年潮流興着Legging，貼身打底長褲已非女仔專利，大把潮男都會將呢種曾被稱為「虧佬褲」嘅潮物穿上身！「萬人迷」碧咸亦唔例外，日前佢大爆最鍾意着「虧佬褲」瞓覺，貪佢緊身得嚟夠Sexy，保暖之餘又舒服。咸爺仲計劃緊明年情人節，推出自家Legging搵真銀。
潮流大吹Legging風，碧咸貴為潮流教父，當然對Legging愛不釋手：「老實講我周不時都會着住貼身褲瞓覺，型呀嘛！」碧咸仲話，已經計劃好喺明年情人節推出自家Legging，等女士們揀禮物時有多一個選擇，送最貼身嘅物品畀愛人。
另一方面，碧咸亦透露三個囝囝愈來愈鍾意同「七妹」（夏柏舒芬）玩，佢哋不時都會拖住妹妹手仔，搞到做老竇嘅佢都好安慰。而碧咸亦睇好囡囡有朝一日會成為運動健將，事關「七妹」要同三個哥哥成長，肯定好多時間接觸到足球，話唔定有朝一日會繼承老竇衣鉢，當上職業足球員，為英格蘭爭光添。