香港隊喺七月底嘅世盃預賽慘敗出局，2014年世盃已經唔關港足事，按照本地波一貫做法，太公波可以摺埋一段日子，留番下屆亞洲盃等大賽殺埋身先至重組港隊出去獻世，然後又再因為備戰不足唔夠打而出局，造成惡性循環。
港足水平每況愈下，太少國際賽係原因之一，班球員冇機會出外見識而淪為井底之蛙，淨係留喺港甲做山寨王，任你贏幾多屆聯賽冠軍都係水貨，一出去踢大賽就現晒形，冇得呃人。
港足係咪冇機會比賽？當然唔係！國際足協每隔一段時間就會安排國際賽事日，冇錦標性質比賽嘅國家或地區，都可以安排熱身賽，其實波總近年已經好積極安排比賽，例如去年十一月就安排世盃八強勁旅巴拉圭訪港，不過當時港隊派咩人腳出戰，練咗幾多課，大家心裏有數。
近年台灣發展足運，每年十月舉辦龍騰盃，邀請同級球隊較量，由於參賽隊伍水準較低，波總上屆係咁意派隊都順利捧盃，對方今屆再邀請港隊去衞冕，波總已經決定派大港腳出戰。
十月份踢太公波，可能會影響本地波安排，例如到時銀牌淘汰賽已經開始，但都希望各甲組會同港腳們好好珍惜呢類國際賽機會，唔好唔派兵，事關香港隊係代表你同我，大家都有份架！
波男