日之泉ＪＣ晨曦今季有不少矚目收購，由傑志加盟嘅「亨利」鄭少偉係其中之一，轉會第一場就要倒戈上陣，「亨利」話來到晨曦就要為新東家全力爭勝，不過如果今仗有「士哥」，都唔會慶祝。
現年廿九歲嘅「亨利」係港甲福將，過往効力南華、飛馬及傑志都有獎盃落袋，由於多次轉會，倒戈賽事亦特別多，佢話：「其實每次倒戈都唔係咁開心，不過來到晨曦，定必盡全力為球隊爭取好成績，我過去兩季効力傑志，好了解佢哋踢法，到時會提醒隊友小心啲。」
「亨利」仲話：「傑志係港甲控球能力最好嘅球隊，當對方進入心臟地帶就要特別小心，緊迫同攔截要做多啲，亦要睇實幾位危險人物，例如盧比度。」