新援5壯士
上季西甲外援盧比度協助傑志捧走聯賽冠軍，更當選足球先生，可見一個好外援係幾咁重要，新一季港甲又有好多新面孔亮相，個個都睇得又打得，因為今季外援條例進一步放寬至「4+1」，即係四名外援加一個亞洲球員名額，即刻睇吓佢哋有幾多斤両！
米路雲洛域（日之泉JC晨曦）
由於增加咗亞洲球員名額，令港甲多咗一班澳洲外援嚟搵食，其中日之泉JC晨曦就搵到筍嘢，就係簽到澳洲小國腳米路雲洛域，令球隊攻擊陣容更完整。米路雲洛域係由前港腳李亞倫搵番嚟，據講一度成為港甲搶手貨，皆因佢技術全面，左右腳皆能，仲有一米九○嘅身高，而且係亞洲球員身份，個個睇見都嗒糖，適逢日之泉JC晨曦今季大搞，啱晒佢發揮啦！
烈馬（和富大埔）
和富大埔唔係淨係靠Lulu搞氣氛，教練張寶春好想搞好隊波，今季畀佢搵到件堅嘢，就係巴西前鋒烈馬。烈馬踢過奧甲，來香港跟操，據講喺一場友賽十五分鐘內入四粒，在場人士個個驚為天人，至於呢件烈馬係咪咁勁，正式比賽時就要𥄫清楚。
戴倫（南華）
南華今季回歸平淡，唔再花巨款請球星，想搵啲實用球員，可惜季初試用嘅巴西前鋒李安奴唔啱用，最近搵到件庫拉索前鋒戴倫，做球隊箭頭。
呢位戴倫係阿積士青訓產品，身材高大，個樣仲有啲似車仔前鋒安歷卡，教練高世安睇過都話好滿意，睇嚟都幾啱使噃！
盧卡斯（天水圍飛馬）
天水圍飛馬上季後防穿大窿，前面入幾多都唔夠後面輸，所以今季痛定思痛，搵咗件高大中堅盧卡斯番嚟，鎮守大後方。據觀察，盧卡斯有身位，技術同制空能力都唔錯，球隊有咗佢，成條防線都定番晒。
潘佳（日之泉JC晨曦）
晨曦今季獲「日之泉」冠名，除咗贊助，中甲廣東日之泉更借出前隊長潘佳，將出任晨曦中場指揮官。
潘佳踢過三屆省港盃，近年亦經常同港甲球隊交手，熟晒波路，相信好快就入局。
今季新援一覽
日之泉JC晨曦
米路雲洛域 中場 澳洲 21歲
侯宇 門將 中國 21歲
潘佳 中場 中國 22歲
麥當勞 前鋒 英格蘭 18歲
屯門
力高 前鋒 塞爾維亞 30歲
域奇 門將 澳洲 21歲
和富大埔
烈馬 前鋒 巴西 26歲
港菁
艾斯古利 前鋒 西班牙 22歲
南華
戴倫 前鋒 庫拉索 28歲
中島法蘭 左閘 加拿大 22歲
傑志
米高 中堅 澳洲 23歲
天水圍飛馬
盧卡斯 中堅 巴西 21歲
卡夫 門將 巴西 27歲
公民
阿馬利 前鋒 巴西 28歲