尖叫惹的禍寶娃破咒死過翻生
【本報綜合報道】靚女唔係人人都啱，尖叫聲驚人的俄羅斯球手舒拉寶娃，來到紐約出戰美網前，就被世界高球「二哥」韋斯活「詛咒」，寶娃面對英國「天才少女」屈臣險陰溝裏翻船，幾經辛苦才反勝2比1破咒。
06年冠軍舒拉寶娃近月戰績回勇，先後在法網及溫布頓打入四強及決賽，外界都睇好她在「阿金」克莉絲塔絲受傷放棄衞冕下，有機會爭這項今年最後一項大滿貫。不過面對曾贏得09年美網青少年女單后座的19歲「天才少女」屈臣，寶娃賽前卻受到韋斯活柴台，這位與屈臣分屬同胞的英國高球名將在twitter鬧寶娃「太嘈吵」，把聲誇張得能傳到幾十公里外：「屈臣加油呀！為了我們的耳根清淨着想，務必要擊敗舒拉寶娃！」
2:1反勝過百位屈臣
比賽首盤寶娃未摸清屈臣的路數，多番失誤以3比6落敗，其後輪到世界排名僅104位的屈臣緊張，寶娃才以7比5及6比3反敗為勝。全場打出58次非壓力下失誤及8個發球雙錯誤的寶娃，賽後自評表現麻麻：「毫無疑問我未打出最高水準，而對方是新人也令我難以捉路，但最重要是取得勝利。」
至於在溫布頓決賽撼贏寶娃的捷克新銳姬維杜娃，同日卻成為最大冷門賽事的悲情主角，以6比7（3比7）及3比6被羅馬尼亞球手杜姬露淘汰出局，令人跌眼鏡。