收費電視台開台播本地波，不過聽講話商討細節時都幾笑話，竟然要甲組會夾錢畀波總承擔部分費用！單嘢點收科就要下回分解嘞！
有電視台高層話開一條新頻道每年要使成四千萬，有球圈人士就提出，既然播本地波對甲組球會有利，球會應該有所付出，夾錢畀電視台播波咁話。
據講，甲組會每個月要繳付嘅「播波費」係四萬大元，一年就要四十八萬，請少個外援都喺番度，不過呢個安排唔係咁公平，因為電視台直播，當然係揀大球會嘅比賽，中下游球會就冇乜機會出鏡，所以隊隊都畀四萬蚊就唔啱數，應該愈播得多就愈畀多啲至啱。
支持大圍夾錢嘅有關人士提出另一理據，話一旦開咗新頻道，甲組會容易啲搵贊助，球會亦有益，但亦只係一廂情願，現實究竟係咪咁就天曉得，因為每間球會情況都唔同，贊助商亦有自己打算，搵贊助唔係想像中咁容易。
電視台播波，理論上球會應該有錢收至係，但本地球市不振，唔少球會都冇諗過收轉播費架嘞，但依家反過來要球會科水，咁就梗係唔係隊隊肯制喇！
波男