單挑偶像周柏豪似發夢
戴歷羅斯今次中國之行，除咗教內地年輕人打波，仲有同香港歌星周柏豪打1 on 1，引來球迷哄動，一直視戴歷羅斯為偶像嘅周柏豪，坦言好似發夢一樣，冇諗過可以同呢位公牛球星切磋球技。
先拔頭籌唔失禮
態度親切嘅戴歷羅斯，昨日落力指導一班年輕籃球員，壓軸戲肉係由Adidas summer league訓練營嘅兩支球隊對碰，充當評判嘅戴歷羅斯，親自選出兩名MVP以作嘉許。
最估唔到嘅係戴歷羅斯同周柏豪嘅對決，掀起全場高潮，當時兩人作技術示範，齊齊練波，但球迷起哄要求兩人鬥波，戴歷羅斯冇令球迷失望，同周柏豪單打獨鬥，仲畀周柏豪入咗第一球添。
戴歷羅斯見周柏豪有料到，即刻不敢怠慢，喺周柏豪面前入樽還以顏色，最終戴歷羅斯喺呢場友誼賽贏波，引來全場歡呼。